اسلام آباد (این این آئی)قومی احتساب بیورو نے شریف خاندان کے خلاف حدیبیہ پیپرز ملز کیس کا ریفرنس دوبارہ نہ کھولنے کا فیصلہ کیا ہے۔ نجی ٹی وی کے مطابق نیب کے ذرائع نے بتایا کہ سپریم کورٹ کی جانب سے لاہور ہائیکورٹ کا فیصلہ کالعدم کرنے تک ریفرنس نہیں کھولاجاسکتا ٗپاناما فیصلے میں بھی حدیبیہ کیس کھولنے کی واضح ہدایت نہیں۔

حکام کے مطابق لاہور ہائیکورٹ کی طرف سے کیس مسترد کرنے کا فیصلہ تا حال برقرار ہے، سپریم کورٹ نے اسے ختم نہیں کیا اس لیے ریفرنس دائر کرنا قانونی عمل نہیں ہوگا۔حدیبیہ پیپرز کیس میں سابق وزیراعظم نواز شریف ٗان کے بھائی وزیراعلیٰ پنجاب شہباز شریف اور دیگر کے خلاف کالے دھن کو سفید کرنے کا الزام تھا۔مشرف دور میں قائم کیے گئے اس کیس کا مرکزی محور موجودہ وفاقی وزیرخزانہ اسحاق ڈار کی طرف سے 2000ء میں مجسٹریٹ کے سامنے دیا گیا وہ اعترافی بیان تھا جس میں انہوں نے نہ صرف منی لانڈرنگ میں ملوث ہونے کا اعتراف کیا بلکہ اس کا الزام سابق وزیراعظم نوازشریف ان کے بھائی شہباز شریف پر بھی عائد کیا تھا۔نیب ذرائع نے بتایا کہ پاناما کیس میں سپریم کورٹ کے فیصلے پر من و عن عملدرآمد کیا جارہا ہے تاہم حدیبیہ کیس اس وقت تک نہیں کھولا جاسکتا جب تک سپریم کورٹ لاہور ہائیکورٹ کے فیصلے کو کالعدم قرار نہیں دیتی۔ذرائع کے مطابق پاناما کیس کے فیصلے میں سپریم کورٹ نے واضح طور پر کیس کھولنے کا حکم نہیں دیا۔