کراچی (این این آئی)حساس اداروں نے کوئٹہ میں دہشت گردی کی واردات میں را کے ملوث ہونے کے امکانات ظاہر کرتے ہوئے کراچی میں بھی عیدالاضحی سے قبل دہشت گردی کے بڑے واقعہ کا خطرہ ظاہر کیا ہے۔ کراچی میں موجود بھارتی خفیہ ایجنسی را کے ایجنٹ عیدالاضحی سے قبل شہر میں کوئی بڑی کارروائی کرسکتے ہیں۔ باخبر ذرائع کے مطابق ملکی سلامتی سے متعلق حساس ادارے کی جانب سے وزارت داخلہ کو کچھ روز قبل رپورٹ پیش کی گئی تھی

جس کے مطابق پاکستان کی جانب سے بھارتی فوج کی مقبوضہ کشمیر میں نہتے کشمیروں کو تشدد کا نشانہ بنائے جانے پر احتجاج اور اس معاملے کو عالمی سطح پر اٹھانے پر بھارتی حکومت نے بھارتی خفیہ ایجنسی را کو بلوچستان اور کراچی میں اپنی سرگرمیاں تیز کرنے کے احکامات جاری کیے ہیں جس کے بعد را نے بلوچستان میں اور سندھ خصوصا کراچی میں اپنے ایجنٹوں کو متحرک کردیا ہے۔ را بلوچستان سے اپنے ایجنٹوں کی گرفتاری کے بعد اپنا نیٹ ورک دوبارہ قائم کرنے کی کوشش میں ہے۔ باخبر ذرائع کا دعوی ہے کہ پیر کو کوئٹہ میں ہونے والی کارروائی را کے نئے نیٹ ورک نے کی، یہی نیٹ ورک کراچی میں بھی دہشت گردی کی کوئی بڑی کارروائی کرنے کی کوشش میں ہے۔ بھارتی ایجنسی پاکستان میں اس طرح کی کارروائی کرکے عالمی توجہ کشمیر سے ہٹا کر پاکستان کی طرف کروانا چاہتی ہے۔ دوسری طرف ایک حساس ادارے نے شہر میں 5 خود کش بمباروں کی شہر میں داخل ہونے کی اطلاعات کے بعد الرٹ جاری کردیا ہے۔ جس میں کہا گیا ہے کہ 5 خودکش حملہ آور اور 3 دہشت گرد شہر میں داخل ہوگئے ہیں۔ اگست کے آخری ہفتے میں ملک کے بڑے شہروں میں عیدالاضحی، جمعہ کے اجتماعات اور خصوصا خریداری کے اہم مراکز میں سیکورٹی سخت کرنے کے احکامات بھی جاری کیے گئے ہیں۔