اسلام آباد(این این آئی)سپیکرقومی اسمبلی سردارایازصادق نے عوامی مسلم لیگ کے سربراہ شیخ رشیداحمد کے ساتھ پیش آنیوالے واقعہ کی تحقیقات خود کرنے کافیصلہ کیاہے اوراس حوالے سے تمام سی سی ٹی وی کیمروں کی فوٹیج منگوالی ہے۔ اس ضمن میں ذرائع نے این این آئی کو بتایا کہ منگل کو قومی اسمبلی کے اجلاس کے دوران شیخ رشید احمد کیخلاف وزیٹرگیلریزسے نعروں اور بعض ارکان اسمبلی کے تیوردیکھتے ہوئے سپیکرقومی اسمبلی نے شیخ رشید احمد کو پیغام بھجوایا کہ وہ اجلاس سے باہرجانے کیلئے سپیکرچیمبر کی لفٹ
استعمال کریں اوراپنی گاڑی تہہ خانہ پارکنگ میں منگوالیں تاہم شیخ رشید احمد نے انکار کردیا سپیکر نے دوبارہ شیخ رشید احمد کوپیغام بھجوایا کہ وہ جب ایوان سے باہرجانے لگیں تو انہیں مطلع کریں تاکہ ان کیساتھ اسمبلی گارڈ بھیجے جاسکیں جو انہیں بحفاظت گاڑی تک چھوڑ آئیں شیخ رشیداحمد نے اس سے بھی انکار کردیا ذرائع کے مطابق شیخ رشید جب ایوان سے باہرنکلے تو ان کیساتھ ناخوشگوار واقعہ پیش آیا جس کی سپیکر نے ازخودتحقیقات کافیصلہ کیاہے اوراس کیلئے تمام سی سی ٹی وی فوٹیج منگوالی ہے۔
