اسلام آباد (مانیٹرنگ ڈیسک) سابق آرمی چیف اور اسلامی عسکری اتحاد کے سربراہ جنرل (ر) راحیل شریف سعودی عرب سے ایک خصوصی طیارے میں لاہور پہنچ گئے ہیں، نجی ٹی وی چینل کے مطابق سابق آرمی چیف جنرل (ر) راحیل شریف پاکستان میں دو روزہ قیام کرنے کے بعد واپس جائیں گے، راحیل شریف سعودی حکومت کے خصوصی طیارے کے ذریعے لاہور آئے ہیں اور ان کے ساتھ ایک
سعودی ساتھی بھی ہیں، جہاز کے عملے کو لاہور کے ایک نجی ہوٹل میں ٹھہرایا گیا ہے راحیل شریف کو سعودی عرب سے پاکستان لانے والا طیارہ آج رات ہی سعودی عرب واپس چلا جائے گا۔ دریں اثناء یہ افواہیں گردش میں تھیں کہ جنرل (ر) راحیل شریف اسلامی عسکری اتحادکی قیادت چھوڑنے والے ہیں مگر تاحال جنرل (ر) راحیل شریف کی طرف سے اس حوالے سے تصدیق یا تردید سامنے نہیں آ سکی ہے۔
