اسلام آباد(مانیٹرنگ ڈیسک) مسئلہ کشمیر کے پر امن حل کیلئے کوشاں ہیں، اقوام متحدہ، عنقریب پیش رفت ہو سکتی ہے، ٹرمپ انتظامیہ۔ تفصیلات کے مطابق اقوام متحدہ کے سیکرٹری جنرل انتونیو گونپرس کا کہنا ہے کہ ایسا نہیں کہ مسئلہ کشمیر پر سنجیدہ نہیں۔ مسئلہ کشمیر کے حل کیلئے بھارتی اور پاکستانی وزرائے اعظم سے مسلسل رابطے میں ہوں اور اس سلسلے میں مختلف
عالمی فورمز میں ان سے ملاقات کر کے مسئلہ کشمیر حل کرنے کی طرف توجہ مبذول کرائی ہے۔ اقوام متحدہ کے سیکرٹری جنرل کے ترجمان سٹیفن ڈوجرک کا کہنا ہے کہ انتونیو گونپرس کو مسئلہ کشمیر پر تشویش ہے تاہم وہ اس کو حل کرنے کیلئے براہ راست مداخلت یا مصالحت کا ارادہ نہیں رکھتے تاہم انہوں نے مسئلہ کشمیر کے دو بنیادی فریقین پاکستان اور بھارت سے یہ کہا ہے کہ وہ بات چیت کے ذریعے اس معاملے کا پر امن حل نکالیں۔دوسری جانب ٹرمپ انتظامیہ کے ایک اعلیٰ عہدیدار نے امید ظاہر ی ہے کہ مسئلہ کشمیر پر عنقریب پیشرفت ہو سکتی ہے اور دونوں ممالک بھارت اور پاکستان امریکی کوششوں کی بدولت مذاکرات کی بحالی پر متفق ہو رہے ہیں ۔ اس دوران پینٹا گون نے پاکستان کا ایک ذمہ دار ملک قرار دیتے ہوئے کہا کہ پاکستانی ایٹمی پروگرام محفوظ ہاتھوں میں ہے ۔ٹرمپ انتظامیہ کے اعلیٰ عہدیدار گیری کوہن نے واشنگٹن میں صحافیوں سے گفتگو کرتے ہوئے انکشاف کیا ہے کہ پاکستان اور بھارت مسئلہ کشمیر پر پیشرفت پر آمادہ ہو رہے ہیں جس کے باعث جلد مسئلہ کشمیر پر پیشرفت متوقع ہے۔ ان کا کہنا تھا کہ امریکہ اب مسئلہ کشمیر کے حل میں سرگرم کردار ادا کرنے کیلئے تیار ہے اور اقوام متحدہ بھی اس حوالے سے کافی متحرک ہو چکا ہے ۔ امرکہ نے دونوں ممالک کی قیادتوں کو اعتماد مےں لے لیا ہے کہ وہ کشمیر سمیت تمام باہمی مسائل کو حل کرنے کیلئے مذاکرات کی بحالی کو یقینی بنا کر خطے میں ایٹمی جنگ کے خطرات کو کم کریں ۔
