لاہور (آئی این پی ) وزیر اعظم نوازشریف نے عوام میں آکر سیاست کرنے کا اعلان کرتے ہوئے کہا ہے کہ کمروں میں بیٹھ کر بہت اجلاس کر لیے اب عوام کے سامنے آگئے ہیں ،سازشیں ہوتی رہتی ہیں مگر ہمارا سفر نہیں رکے گا ،شہباز شریف اکثر نیک نیتی میں بڑی باتیں کر جاتے ہیں انہیں کہتا ہوں سوچ سمجھ کر بولا کریں، ہر طرف میڑو میڑو ہو رہی ہے ۔ این اے 119میں کارکنوں سے خطاب کرتے ہوئے انہوں نے کہا کہ الزامات لگانے والوں اور دھرنے والوں کو ووٹ دینے والے آج پچھتا رہے ہیں ۔

مخالفین کا ایجنڈا کیا ہے معلوم نہیں ۔ہم نے پنجاب اور لاہور کی شکل تبدیل کر دی ۔ہم نے بجلی اور عوام سے کیے گئے وعدے پورے کر دیے ۔وزیر اعظم نے  کہا کہ پہلے پاکستان کو ایٹمی طاقت بنایا اور اب ملک کو معاشی طاقت بنانے جا رہے ہیں ، لاہور سے کراچی موٹر وے مکمل ہونے جا رہی ہے ۔ ہر طرف میڑو میڑو ہو رہی ہے ۔ دھرنے ،  الزام لگانا ایک جماعت کا وطیرہ بن چکا ہے.ریلوے پر 800ارب روپے خرچ کرنے جارہے ہیں ، ٹرین اب 160 کی سپیڈ سے دوڑے گی جبکہ کراچی اور گوادر پورٹ پر تیزی سے کام جاری ہے۔