راولپنڈی( آن لائن) بھارتی فوج نے ایک بار پھر لائن آف کنٹرول کی خلاف ورزی کرتے ہوئے بلااشتعال فائرنگ کی ہے جس کے نتیجے میں 2 شہری زخمی ہوگئے ہیں۔ پاک فوج کے شعبہ تعلقات عامہ آئی ایس پی آر کے مطابق بھارتی فورسز نے ایک بار پھر لائن آف کنٹرول پرسیز فائرمعاہدے کی خلاف ورزی کرتے ہوئے بلا اشتعال فائرنگ کی اور شہری آبادی کو نشانہ بنایا جس کے نتیجے میں دو شہری زخمی ہوئے۔

ترجمان کے مطابق پاک فوج نے بھی بھارتی فائرنگ کا بھرپور جواب دیا۔ جس کے باعث دشمن کی گنیں خاموش ہوگئیں۔یاد رہے کہ 1 جون کو بھی بھارتی فوج کی جانب سے لائن آف کنٹرول پر بلااشتعال فائرنگ کی گئی تھی۔ جس کے نتیجے میں 3 شہری زخمی ہوگئے تھے۔ پاک فوج نے بھارتی جارحیت کا منہ توڑ جواب دیتے ہوئے دشمن کی کرارا جواب دیاتھا۔