راولپنڈی(آئی این پی )سعودی عرب کے فرمانروا سلمان بن عبدالعزیز نے دہشت گردی کے خاتمے اور خطے میں امن واستحکام کیلئے پاکستان کی کوششوں کوقابل تحسین قراردیا ہے ۔ پاک فوج کے شعبہ تعلقات عامہ (آئی ایس پی آر) کے مطابق بدھ کو سعودی عرب کے سرکاری دورے پر گئے چیئرمین جوائنٹ چیفس آف سٹاف کمیٹی جنرل زبیر محمود حیات نے سعودی فرمانروا سلمان بن عبدالعزیز السعود سے ملاقات کی ،
انہوں نے سعودی شاہی مسلح افواج کے چیف آف جنرل سٹاف جنرل عبدالرحمان بن صالح سے بھی جدہ میں ملاقات کی ۔ اس دوران خطے کی سلامتی اور باہمی دلچسپی کے دوطرفہ امور پر تفصیلی تبادلہ خیال کیا گیا ۔ اس موقع پر چیئرمین جوائنٹ چیفس آف سٹاف کمیٹی جنرل زبیر محمود حیات کو سعودی عرب کے اعلیٰ ترین ایوارڈ ’’کنگ عبدالعزیز میڈل آف ایکسیلنس‘‘ سے بھی نوازا گیا۔
