اسلام آباد(مانیٹرنگ ڈیسک) نجی ٹی وی چینل ایکسپریس نیوز کے پروگرام’’کل تک‘‘سینئر اینکر پرسن جاوید چوہدری سے گفتگو کرتے ہوئے معروف عالم دین مولانا طارق جمیل نے کہا ہے کہ جنید جمشید نے اللہ سے محبت کی اور اللہ کی راہ میں نکلے تو اللہ نے جنید جمشید کی محبت ہر دل میں پیدا فرما دی۔ میں نے ایسا سوگ بڑی بڑی ہستیوں کیلئے بھی نہیں دیکھا جو جنید جمشید کے حصے میں آیا ہے۔

مولانا طارق جمیل نے کہا کہ میں جنید جمشید کی اہلیہ سے تعزیت کیلئے گیا تو وہ فرما ر ہی تھیں کہ جنید جمشید مجھے کہہ رہے تھے کہ عائشہ تم ناراض نہ ہونا میں نے اللہ کے راستے کی شہادت مانگ لی اور میرے پاس وقت تھوڑا ہے۔ بچوں کی جلدی شادی کر دو۔ انشاء اللہ میرے بچے تمہارا خیال رکھیں گے۔ میرے پاس وقت تھوڑا ہے۔ مولانا طارق جمیل نے کہا کہ جنید جمشید کی اہلیہ نے مجھے بتایا کہ جنید جمشید کہا کرتے تھے کہ عائشہ مجھے لگتا ہے میرے پاس صرف 52 سال ہی ہیں اور اس سے زیادہ وقت نہیں۔ اللہ تعالیٰ نے اسی کے مطابق جنید جمشید کو میرے پاس بلایا۔