اسلام آباد(مانیٹرنگ ڈیسک) نجی ٹی وی پروگرام میں گفتگو کرتے ہوئے سینئر صحافی حبیب اکرم نے کہا ہے کہ پاک فوج کے نئے تعینات ہونے والے سپہ سالار آرمی چیف جنرل قمرجاوید باجوہ سابق چیف آف آرمی سٹاف جنرل اشفاق پرویز کیانی کے پرائیویٹ سیکرٹری بھی رہ چکے ہیں، اس وقت جنرل قمر باجوہ بریگیڈیئر تھے۔ حبیب اکرم نے کہا کہ فوج میں جنرل (ر) کیانی کا کردار بھی بہت اہم رہا ہے۔
قبل ازیں ایک اور نجی ٹی وی پروگرام میں گفتگو کرتے ہوئے پاکستان تحریک انصاف کے مرکزی رہنماء فواد چوہدری نے کہا ہے کہ نواز شریف نے جنرل اشفاق ندیم کو آرمی چیف اسلئے نہیں بنایا کیونکہ وہ انتہائی سخت آدمی ہیں۔ جنرل اشفاق ندیم کسی بات پر سمجھوتہ نہیں کرتے اور نہ ہی وہ کوئی غلطی کرتے ہیں۔ فواد چوہدری نے کہا کہ اس کے برعکس جنرل قمر جاوید باجوہ کے بارے میں ایسا کوئی تاثر نہیں ، قمر جاوید باجوہ بھی جنرل اشفاق ندیم کی طرح ایک انتہائی پیشہ ور فوجی ہیں اور انہیں کئی اہم اقدامات میں کمانڈ کا تجربہ بھی حاصل رہا ہے۔