اسلام آباد (آن لائن) پیپلز پارٹی کے رہنما قمر زمان کا ئرہ نے کہا ہے کہ وفاق ڈاکٹر عشرت العباد کے دہشتگردوں سے مراسم کے متعلق جانتی تھی تو 3سال گورنر کیوں بنائے رکھا۔ تفصیلات کے مطابق جمعہ کے روز نجی ٹی وی سے گفتگو کرتے ہوئے پاکستان پیپلز پارٹی کے رہنما قمر زمان کا ئرہ نے کہا کہ نئے گورنر سعید الزمان کی تقریریں حیران کن ہیں۔ وفاقی حکومت نے ایسے شخص کو گورنر بنایا ہے جس کی صحت دوست نے اور عمر 80سال تک پہنچ چکی ہے۔ لگتا ہے کہ سعید الزمان کو ماضی میں مسلم لیگ کی خدمات کا صلہ فراہم کیا گیا ہے۔ نہال ہاشمی کی جانب سے سابق گورنر عشرت العباد پر دہشتگردوں کے نمائندے اور سندھ حکو مت کی جانب سے گرفتار نہ کرنے کے الزام پر کہا کہ نہال ہاشمی کو کیا جواب دوں وہ تو خود اپنی ہی حکومت پر تنقید کر رہے ہیں۔ سندھ حکومت کا رویہ وزیراعلیٰ شہباز شریف والا نہیں ہے۔ انہوں نے کہا کہ ن لیگ اگر ڈاکٹر عشرت العباد کے بارے میں سب جانتی تھی تو ان کا نام ای سی ایل میں کیوں نہیں ڈالا اور کیا وفاق نے 3سال تک دہشتگردوں کے نمائندے کو کیوں گورنر بنائے رکھا۔