اسلام آباد (مانیٹرنگ ڈیسک)اسلام آباد موٹر وے پر تیز رفتاری کے باعث پاکستان رینجرز کی گاڑی الٹنے سے تین رینجرز اہلکار جاں بحق جبکہ دس شدید زخمی ہوگئے۔ موٹر وے پولیس کے مطابق جمعرات کو اسلام آباد موٹر وے پر تیز رفتاری کے باعث پاکستان رینجرز کی گاڑی الٹنے سے تین اہلکار جاں بحق جبکہ دس شدید زخمی ہوگئے۔ ریسکیو ذرائع کے مطابق جاں بحق افراد کی لاشوں اور زخمیوں کو سی ایم ایچ ہسپتال منتقل کردیا گیا۔ پولیس ذرائع کے مطابق گاڑی کو حادثہ ایم ون پر ٹائی راڈ ٹوٹنے کے باعث پیش آیا۔
دوسری جانب منگھوپیر میں رینجرز سے مقابلے میں تین دہشت گرد مارے گئے۔ ترجمان رینجرز کے مطابق منگھوپیر میں رینجرز نے دہشت گردوں کی موجودگی کی اطلاع پر چھاپہ مارا۔ جہاں پہلے سے موجود دہشت گردوں نے رینجرز اہلکاروں پر فائرنگ کر دی۔ ترجمان کے مطابق دہشت گردوں کی فائرنگ سے ایک سپاہی زخمی ہو گیا۔ جوابی کارروائی میں ایک دہشت گرد ہلاک ہوا جبکہ ان کے دیگر ساتھی فرار ہو گئے۔ رینجرز نے علاقے کی ناکہ بندی کر کے ملزمان کی تلاش شروع کی اور ایک بار پھر فائرنگ کے تبادلے میں مزید دو دہشت گرد ہلاک ہو گئے۔ ترجمان رینجرز کا کہنا ہے کہ مارے گئے ملزمان کا تعلق کالعدم جماعت سے ہے۔ جن سے بھاری تعداد میں ہتھیار اور اسلحہ برآمد ہوا ہے۔

موضوعات:رینجرز حادثہ