اسلام آباد(مانیٹرنگ ڈیسک) میڈیا ذرائع کے مطابق با اثر سفارتی ذرائع کا کہناہے کہ بھارت کا جنگی جنون ٹھنڈا کرنے میں واشنگٹن کا بہت بڑا ہاتھ ہے ۔تفصیلات کے مطابق آج دوسری بار بھارت کی جانب سے لائن آف کنٹرول کی خلا ف ورزی کی گئی جس کے بعد افواج پاکستان نےفوری ایکشن لیتے ہوئے بھارتی توپوں کو خاموش کر دیا اور حالیہ جنگی جارحیت کے بعد بھارت کو اب احساس ہوگیا ہے کہ پاکستان کیخلاف فوجی آپشن سے نقصان پاکستان کا نہیں بلکہ خود ان کا اپنا ہوگا اور اسی چیز کو مد نظر رکھتے ہوئے بھارت نے ایل او سی کی خلاف ورزی کے باوجود فوری ایکشن لیتے ہوئے پاکستان کو صلح اور امن کا پیغام پہنچایا۔کچھ ذرائع کا یہ بھی کہنا تھا کہ پاکستان پر حملہ کرنے سے بھارت کو باز رکھنے میں واشنگٹن کا بڑا ہاتھ ہے ۔ ذرائع کاکہناتھا کہ لائن آف کنٹرول کی خلاف ورزی کے بعد نریندر مودی کے ایک سینئرمشیر نے اسلام آباد میں ایک اہم شخصیت سے رابطہ کرکے وزیراعظم نواز شریف تک پیغام پہنچایا ہے کہ بھارت کشیدگی میں مزید اضافہ نہیں چاہتا۔واضح رہے کہ آج چھمب سیکٹر پر بھارتی فوج نے بلااشتعال فائرنگ کی ہے اور فائرنگ کا یہ سلسلہ 2گھنٹے تک جاری رہا، تاہم پاک فوج کی جانب سے بھرپور جوابی کارروائی کی گئی ہے