اسلام آباد (مانیٹرنگ ڈیسک)آرمی چیف جنرل راحیل شریف نے بھارت کی جانب سے مخالفانہ پراپیگنڈے کا نوٹس لیتے ہوئے واضح کیا ہے کہ پاکستان کی مسلح افواج کسی بھی طرح کے براہ راست یا بالواسطہ خطرے سے نمٹنے کیلئے پوری طرح تیار ہیں۔ خطے میں رونماء ہونیوالی تازہ ترین پیشرفتوں پر گہری نظر رکھے ہوئے ہیں اور ان کے پاکستان کی سیکیورٹی پر ممکنہ اثرات کا بھی جائزہ لے رہے ہیں۔آئی ایس پی آر کے مطابق چیف آف آرمی سٹاف جنرل راحیل شریف کی زیر صدارت کورکمانڈرز کانفرنس پیرکو جی ایچ کیو میں ہوئی ، اجلاس کے دوران بیرونی اوراندرونی سیکیورٹی صورتحال اور فوج کی آپریشنل تیاریوں کا تفصیلی جائزہ لیا گیا، بھارت کی جانب سے مخالفانہ پراپیگنڈے کا نوٹس لیتے ہوئے آرمی چیف جنرل راحیل شریف نے کہا کہ ہم خطے میں ہونیوالی تازہ ترین پیشرفتوں سے بخوبی آگاہ ہیں اور ان پر گہری نظر رکھے ہوئے ہیں اور ان کے پاکستان کی سیکیورٹی پر ممکنہ اثرات کا بھی جائزہ لے رہے ہیں۔
آرمی چیف نے پاک فوج کی پیشہ وارانہ تیاریوں پر اطمینان کا اظہار کرتے ہوئے کہا کہ پاکستان کی مسلح افواج کسی بھی طرح کے براہ راست یا بالواسطہ خطرے سے نمٹنے کیلئے پوری طرح تیار ہیں ۔ انہوں نے کہا کہ پاکستان کی مسلح افواج نے حوصلہ مند قوم کیساتھ مل کر ہر چیلنج کا کامیابی سے مقابلہ کیا ہے اور مستقبل میں بھی پاکستان کی خود مختاری اور سالمیت کیخلاف کسی بھی طرح کے ناپاک عزائم کو ناکام بنا دیا جائیگا۔ پاک فوج کے سربراہ نے آپریشن ضرب عضب پر ہونیوالی پیشرفت پر اطمینان کا اظہار کرتے ہوئے آرمی ، ایف سی ، رینجرز اور پولیس کے افسران اور جوانوں کو خراج تحسین پیش کیا جنہوں نے دہشت گردوں کا ملک کے طول وعرض میں مقابلہ کرتے ہوئے عظیم قربانیاں پیش کیں