لاہور (این این آئی )پاکستان تحریک انصاف نظریاتی کے بعد پاکستان تحریک انصاف یو تھ ونگ نے سیکرٹری جنرل جہانگیر ترین کے خلاف بغاوت کا اعلا ن کر دیا، باقاعدہ تحریک چلانے کا فیصلہ کر کے اشتہارات بھی چھپوا لیے گئے جنہیں رائیونڈ مارچ کے روز احتجاجی ریلی کے روٹ پر آویزاں کیا جائے گا۔ پاکستان تحریک انصاف یو تھ ونگ کی جہانگیر ترین کے خلاف بغاوت کھل کر سامنے آگئی ہے اور یو تھ ونگ نے ملک بھر میں جہانگیر ترین کے خلاف بغاوت کی تحریک چلانے کا فیصلہ بھی کر لیا ہے۔ ذرائع کے مطابق پی ٹی آئی کے یو تھ ونگ نے پا رٹی ونگز کو ضلعی صدور کے ماتحت کرنے پرجہانگیر ترین کے خلاف مہم چلانے کی تیاری شروع کر دی ہے جس کیلئے جہانگیر ترین کے خلاف بینرز، اشتہارات اور فلیکسز بھی بنوا لئے گئے ہیں جن پر’’ ہمیں جہانگیر ترین کے نظریے والا پاکستان نہیں چاہیے ‘‘ اور’’جہانگیر ترین نامنظورنامنظور‘‘کے نعرے درج ہیں۔یو تھ ونگ کے مطابق ان بینرز ، اشتہارات اور فلیکسز کو رائیونڈ مارچ کے روز احتجاجی ریلی کے روٹ پر آویزاں کیا جائے گا۔ واضح رہے کہ یو تھ ، لیبر اور خواتین ونگز کو ضلعی صدور کے ماتحت کر نے کا نو ٹیفکیشن جا ری ہو ا تھاجس پر یو تھ اور لیبر ونگز نے جہانگیر ترین کے خلاف اعلان بغاوت کردیا۔

موضوعات:تحریک انصاف بغاوت