کراچی (آئی این پی) بابائے قوم قائد اعظم محمد علی جناح ؒ کا 68واں یوم وفات آج کو عقیدت و احترام سے منایا جا رہا ہے ۔بانی پاکستان کی روح کے ایصال ثواب کیلئے آج ملک بھرمیں قرآن خوانی ،اور قائد اعظم کے مزار پر سیاسی شخصیات،مسلح افواج کے نمائندے اور شہری حاضری دیں گے اور پھولوں کی چادریں چڑھائی جائیں گی۔ بابائے قوم کے یوم وفات کے سلسلے میں ملک بھر میں سیمینارز،مذاکرے،جلسوں اور مختلف تنظیموں کی جانب سے تقریبات کا اہتمام کیا جائے گاجس سے خطاب کے دوران سیاسی و سماجی شخصیات بانی پاکستان کی خدمات کو خراج عقیدت پیش کریں گے ۔یوم وفات کے سلسلے میں اخبارات سپیشل ایڈیشن شائع کریں گے جبکہ پی ٹی وی ،نجی ٹی وی چینلز اور علاقائی زبانوں کے ٹی وی چینلز بھی یوم وفات قائد اعظم کے سلسلے میں خصوصی پروگرام نشر کریں گے۔بانی پاکستان قائد اعظم محمد علی جنا ح ؒ 25دسمبر 1876ء کو کراچی میں پیدا ہوئے۔ آپ ایک عظیم لیڈر تھے جن کی بے باک قیادت میں مسلمانوں نے ایک علیحدہ وطن حاصل کیا آپ پاکستان کے پہلے گورنر جنرل بنے ۔آپ11ستمبر 1948ء کو وفات پا گئے تھے۔