اسلام آباد(مانیٹرنگ ڈیسک) پاک فوج کے سپہ سالار جنرل راحیل شریف اس وقت پاکستان میں سب سے زیادہ مقبول ترین شخصیت ہیں۔ جنرل راحیل شریف پاکستان کے پہلے آرمی چیف ہیں جن کی مقبولیت کا عالم یہ ہے کہ ہر پاکستانی ان کی مدت ملازمت میں توسیع کا خواہاں ہے۔ پاک فوج کے سپہ سالار راحیل شریف کی مقبولیت کا اندازہ اس بات سے لگایا جا سکتا ہے کہ ماہ اگست کے آغاز سے ہی 14 اگست کو یوم آزادی کی تیاریاں عروج پر ہیں اور ان تیاریوں میں جہاں جھنڈوں اور بیجز پر پاکستان کا جھنڈا بنایا جا رہا ہے وہیں عوام بڑی تعداد میں جنرل راحیل شریف والے بیجز بھی خرید رہی ہے۔
یوم آزادی کے حوالے سے مخلتف سٹالز پر آرمی چیف جنرل راحیل شریف کی تصاویر، بیجز اور لاکٹ بھی دستیاب ہیں جو ہاتھوں ہاتھ فروخت ہو رہے ہیں۔ آرمی چیف کی تصاویر والے بیجز، لاکٹ اور دیگر اشیاء کی فروخت کا عالم یہ ہے کہ سٹالز مالکان کو ایک دن میں دو دو بار مال منگوانا پڑتا ہے۔ سروے رپورٹ کے مطابق آرمی چیف کے بیجز، لاکٹ وغیرہ روزانہ تقریباََ50ہزار سے 1 لاکھ کی تعداد میں فروخت ہو رہے ہیں۔ آرمی چیف جنرل راحیل شریف کی مقبولیت کا سبب پاک فوج کے ضرب عضب آپریشن میں شاندار کارناموں اور ملک میں امن و امان کی صورتحال کو بحال کرنے میں اہم کردار ادا کرنا ہے۔ آرمی چیف کی سرکردگی میں پاک فوج عوام کے دلوں میں گھر کر گئی ہے۔ واضح رہے کہ جنرل راحیل شریف پاکستان کی تاریخ کے تمام جرنیلوں کو پیچھے چھوڑتے ہوئے مقبولیت میں سب پر بازی لے گئے ہیں۔