اسلام آباد (این این آئی)عمران خان اورطاہر القادری کی گرفتاری،پولیس کاموقف سامنے آگیا،تھانہ سیکرٹریٹ پولیس نے عدم تعمیل سے متعلق رپورٹ عدالت میں جمع کرا تے ہوئے موقف اختیار کیا کہ عمران خان کے گھر بنی گالہ گئے مگر وہ موجود نہیں تھے،انسداد دہشت گردی کی خصوصی عدالت کے جج سہیل اکرام نے دھرنوں کے دوران ایس ایس پی عصمت اللہ جونیجو پر تشدد کرنے کے مقدمہ میں پاکستان تحریک انصاف کے چیئرمین عمران خان اور عوامی تحریک کے سربراہ ڈاکٹر طاہر القادری کے ناقابل ضمانت وارنٹ گرفتاری کی تعمیل نہ ہو نے کے باعث سماعت 20ستمبر تک ملتوی کردی ۔ پیر کو عدالت نے مقدمہ کی سماعت کی تو تھانہ سیکرٹریٹ پولیس نے عدم تعمیل سے متعلق رپورٹ عدالت میں جمع کرا تے ہوئے موقف اختیار کیا کہ عمران خان کے گھر بنی گالہ گئے مگر وہ موجود نہیں تھے، ڈاکٹر طاہر القادری کے گھر بھی گئے مگر وہ بھی نہیں ملے ،جس پر عدالت نے ڈاکٹر طاہر القادری اور عمران خان کے ناقابل ضمانت وارنٹ گرفتاری برقرار رکھتے ہوئے مقدمہ کی مزید سماعت 20ستمبر تک ملتوی کر دی ۔دونوں سیاسی جماعتوں کے سربراہان کے خلاف باوردی اہلکار پر تشدد، کارسرکار میں مداخلت اور انسداد دہشتگردی کے دفعات کے تحت تھانہ سیکرٹریٹ پولیس نے 19 ستمبر 2014 کو مقدمہ درج کر کے کاروائی شروع کی تھی ۔