کابل (مانیٹرنگ ڈیسک )افغانستان کے مشرقی صوبہننگر ہار میں امریکی ڈرون حملے میں کالعدم شدت پسند تنظیم لشکر اسلام کا بدنام زمانہ سرغنہ منگل باغ ماراگیا ،منگل باغ پاکستان کو متعدد دہشتگردانہ کارروائیوں میں مطلوب تھا جبکہ پاکستانی حکومت نے اس کے سر کی قیمت 2 کروڑ روپے مقرر کررکھی تھی۔غیر ملکی میڈیا کے مطابق افغان مشرقی صوبہ ننگر ہار میں امریکی ڈرون حملے میں کالعدم شدت پسند تنظیم کا بدنام زمانہ سرغنہ منگل باغ ماراگیا ہے ۔واضح رہے کہ 22 جولائی کی شب افغان صوبے ننگر ہار کے علاقے خودی خولہ میں امریکی ڈرون حملے میں منگل باغ شدید زخمی ہوگیا تھا جس کے بعد اسے مقامی طور پر ہی طبی امداد دی جارہی تھی تاہم وہ زخموں کی تاب نہ لاسکا اور دم توڑگیا۔ طالبان اور انٹیلی جنس ذرائع نے منگل باغ کی ہلاکت کی تصدیق کردی ہے جبکہ لشکر اسلام نے تاحال اپنے سرغنہ کی ہلاکت کی تصدیق نہیں کی ۔منگل باغ کا اصل نام حاجی عامر منگل باغ تھا اور وہ پاکستان کے زیر انتظام خیبر ایجنسی کے علاقے تحصیل باڑہ کے آفریدی قبیلے سے تعلق رکھتا تھا۔منگل باغ پہلے ایک ٹیکسی ڈرائیور تھا لیکن بعد ازاں اس نے اپنا عسکریت پسند گروپ لشکر اسلام کے نام سے تشکیل دے دیا تھا۔ آپریشن ضرب عضب شروع ہونے کے بعد لشکر اسلام میں شامل کارندے افغانستان فرار ہوگئے تھے ۔