اسلام آباد (مانیٹر نگ ڈیسک ) جماعت اسلامی کی کشمیر ریلی کو بھارتی ہائی کمیشن جانے سے روکنے کے لیے ریڈ زون کو کنٹینرز لگا کر سیل کردیا گیا ، انتظامیہ نے ریڈ زون کے باسیوں کے لیے متبادل ٹریفک پلان بھی جاری کر دیا ۔ جماعت اسلامی کی طرف سے کشمیر ریلی کے شرکاء کی طرف سے ریڈ زون میں بھارتی ہائی کمیشن کو یادداشت پیش کرنے سے روکنے کے لیے اسلام آباد کی انتظامیہ نے ریڈ زون کے تمام داخلی و خارجی راستوں کو کنٹینرز کھڑے کر کے بند کر دیا ۔ ریڈ زون کو سرینا ہوٹل ، نادرا چوک ، ایم این ایز ہاسٹل اور مارگلہ ہوٹل کے قریب سے بند کر دیا گیا ۔ ٹریفک پولیس نے ریڈ زون میں میں داخلے کے لیے ہدایت نامہ بھی جاری کر دیا ہے جس کے مطابق پارلیمنٹ ، ایوان صدر سے باہر نکلنے والی ٹریفک مارگلہ روڈ استعمال کرتے ہوئے فیصل ایونیو سے باہر نکل سکے گی جبکہ سیکٹر جی ، ایف اور سیون سکیٹروں سے نکلنے والے سیونتھ ایونیو کے ذریعہ کشمیر ہائی وے کو استعمال کرسکیں گے ۔ مری سے لاہور ، پشاور موڑ جانے والے کشمیر چوک ، فیض آباد ، فیصل ایونیو کا راستہ استعمال کرسکتے ہیں ۔ سرینا ہوٹل سے سہروردی اور کشمیر ہائی وے سیونتھ ایونیو تک شاہراہیں دوپہر تین بجے کے بعد بند ہوں گی ۔