اسلام آباد(آئی این پی)وفاقی وزیر داخلہ چوہدری نثار علی خان نے آئی جی اسلام آباد پولیس طارق مسعود یاسین کے وفاقی دارلحکومت میں دہشت گردوں کیخلاف کارروائی کے حوالے سے بیان پر شدید برہمی کا اظہار کر تے ہوئے کہا ہے کہ آئی جی اسلام آباد پولیس کو دہشتگردوں کے خلاف کارروائی کے حوالے سے میڈیا کو نہیں بتانا چاہیے تھا ،اس طرح کی خبروں سے عوام میں خوف و ہراس پھیلتا ہے ۔تفصیلات کے مطابق جمعرات کو آئی جی اسلام آباد پولیس طارق مسعود یاسین نے میڈیا سے غیر رسمی گفتگو کر تے ہوئے کہا تھا کہ اسلام آباد پولیس نے رواں سال جون میں کامیاب کارروائی کر کے ممبئی طرز کے حملوں کو ناکام بنا یا ہے ۔ذرائع کے مطابق آئی جی اسلام آباد کے بیان پر وفاقی وزیر داخلہ چوہدری نثار علی خان نے بیان پر شدید برہمی کا اظہار کر تے ہوئے کہا ہے کہ آئی جی اسلام آباد پولیس کو دہشتگردوں کے خلاف کارروائی کے حوالے سے میڈیا کو نہیں بتانا چاہیے تھا ،اس طرح کی خبروں سے عوام میں خوف پھیلتا ہے ۔وزیر داخلہ نے صحافیوں کی موجودگی میں اپنے سٹاف آفیسر کو ہدایت کی ہے کہ وہ آئی جی اسلام آباد پولیس تک ان کے خدشات پہنچا دیں اور انہیں ہدایت دیں کہ آئندہ وہ اسطرح کے بیانات میڈیا کو نہ دیں ۔