اسلام آباد (این این آئی )پاکستان نے مقبوضہ کشمیر میں نہتے کشمیریوں پر بھارتی جارحیت کی شدید مذمت کرتے ہوئے رواں ماہ سفیروں کی کانفرنس بلانے کا فیصلہ کیا ہے ۔دفتر خارجہ کے ذرائع نے بتایا کہ حکومت نے رواں ماہ کے آخر میں بیرون ملک تعینات پاکستانی سفیروں کی کانفرنس بلانے کا فیصلہ کیا ہے ۔ کانفرنس وزیر اعظم نواز شریف کی ہدایت پر کی جا رہی ہے ۔ کانفرنس کے ایجنڈے میں کلبھوشن یادیو ، پاک افغان بارڈر اور کشمیر پالیسی شامل ہے ۔ ذرائع نے بتایا کہ طارق فاطمی کی سربراہی میں کانفرنس کی تیاریاں شروع کردی گئی ہیں ٗ کانفرنس کے اختتام پر پاکستانی سفیروں کو خارجہ پالیسی کے حوالے سے خصوصی ٹاسک دیئے جائیں گے اور را ایجنٹ کی پاکستانی سے گرفتاری ، مقبوضہ کشمیر میں بھارتی مظالم کو دنیا کے سامنے رکھا جائے ۔