اسلام آباد(مانیٹرنگ ڈیسک) سینئر صحافی و تجزیہ نگار نے نجی ٹی وی پروگرام میں حیرت انگیز انکشافات کر دیئے۔ نجی ٹی وی پروگرام میں گفتگو کرتے ہوئے سینئر صحافی تجزیہ نگار عارف نظامی نے کہا کہ ریحام خان کے ساتھ شادی کرکے عمران خان نے اوکھلی میں سر دے دیا تھا۔ اب جو اطلاعات ہیں اس کے مطابق عمران خان کی اب جو تیسری شادی ہونے جا رہی ہے وہ ارینج میرج ہے، اس بار ایک تبدیلی یہ دیکھنے میں آئی ہے کہ عمران خان نے عید اپنی فیملی کے ہمراہ منائی ہے اور وہ دو تین دن لاہور رہے ہیں۔
عمران خان جیسے پہلے بچوں سے شادی کی اجازت مانگنے گئے تھے اس بار بھی وہ لندن اسی مقصد کیلئے گئے تھے۔ عمران خان کو ان کے اہلخانہ کی طرف سے دو چار خواتین بھی دکھائی گئی ہیں۔ عارف نظامی نے کہا کہ ایک طرف عمران خان خواتین کو دیکھ رہے ہیں تو دوسری طرف یہ 62 سالہ نوجوان خواتین کی آنکھوں کا تارا ہے اور اس میں کوئی شک نہیں۔ عمران خان نے ہاتھ میں ایک ’’پتھر‘‘ والی انگوٹھی پہنی ہوئی ہے جس کے بارے میں کہا جا رہا ہے کہ وہ ان کے پیر صاحب کے مشورے پر ہے۔ عمران خان کو کہا جا رہا ہے کہ اگر انہوں نے وزیر اعظم بننا ہے تو اس کیلئے شادی کرنا ضروری ہے۔