اسلام آباد (این این آئی) وزیر اعظم محمد نواز شریف نے مقبوضہ کشمیر میں بھارتی فورسز کی فائرنگ سے برہان وانی سمیت دیگر کشمیریوں کی شہادت کے واقعات پر سخت تشویش کا اظہار کرتے ہوئے مطالبہ کیا ہے کہ بھارت اقوام متحدہ کی سلامتی کونسل کی قراردادوں کے مطابق اپنے وعدے پورے کرے، نہتے کشمیریوں پر طاقت کا استعمال انہیں حق خود ارادیت سے نہیں ہٹا سکتا۔ایک بیان میں وزیراعظم محمد نوازشریف نے بھارتی فورسز کی جانب سے فائرنگ سے برہان وانی سمیت دیگر کشمیریوں کی شہادت کے واقعات پر سخت تشویش کا اظہار کرتے ہوئے کہا ہے کہ بھارتی حکومت سلامتی کونسل کی قراردادوں کے مطابق وعدے پورے کرے، انہوں نے کہا کہ کشمیریوں کیخلاف طاقت کا غیر قانونی استعمال قابل افسوس ہے۔ انہوں نے کہا کہ نہتے کشمیریوں پر طاقت کا استعمال انہیں حق خود ارادیت سے نہیں ہٹا سکتا، وزیراعظم محمد نواز شریف نے مقبوضہ کشمیر میں حریت کانفرنس کے رہنماؤں کی نظر بندی پر بھی تشویش کا اظہار کرتے ہوئے کہا کہ بھارتی حکومت اپنی انسانی حقوق کی ذمہ داریاں پوری کرے۔ اقوام متحدہ کی قراردادوں کے مطاقت حق خود ارادیت کشمیریوں کا حق ہے۔