اسلام آباد(مانیٹرنگ ڈیسک )پاکستان نے افغان صدر اشرف غنی کے لگائے گئے الزامات پر سخت افسوس کا اظہار کرتے ہوئے کہا ہے کہ پاکستان افغانستان میں امن کا قیام چاہتا ہے ، افغان حکومت الزام تراشی کا سلسلہ بند کرے ۔ ہفتہ کو افغان صدر اشرف غنی کے نیٹو سربراہ اجلاس میں پاکستا ن پر لگائے گئے الزامات پر اپنے ردعمل میں دفتر خارجہ کے ترجمان نفیس زکریا نے کہا کہ افغان صدرکے ریمارکس پر افسوس ہوا ہے ۔ پاکستان افغانستان مین امن کا قیام چاہتا ہے اور وہ اس سلسلے میں اپنی کوششیں جاری رکھے ہوئے ہے۔ پاکستان افغان عمل میں اپنا کردار ادا کر رہا ہے ۔ افغان حکومت کی الزام تراشی نقصان دہ ہے اور وہ یہ الزام تراشی کا سلسلہ بند کرے ۔ انہوں نے کہا کہ نیٹو اجلاس میں افغان صدر کے بیان پر پاکستان کو مایوسی ہوئی ہے ۔ افغانستان میں امن پاکستان کے مفاد میں ہے اور وہ افغانستان میں امن کے لئے اپنی ناکامیوں پر افغان قیادت کا پاکستان کو موردالزام ٹھہرانا بدقسمتی ہے ۔ دہشتگردی کے خلاف جنگ میں افغانستان سے تعاون کی توقع رکھتے ہیں ۔ افغان حکومت کو مفروضوں کی بنیاد پر الزام تراشی سے گریز کرنا چاہیے ۔