لاہور(این این آئی ) مفتی منیب الرحمن نے شوال المکرم کے چاند کا اعلان کرتے ہوئے کہاکہ آج کا چاند بہت حساس اور نازک تھا فنی اعتبار سے بھی ففٹی ففٹی کی صورتحال تھی بہر حال علماء نے شرعی اعتبار اور ماہرین نے فنی اعتبار سے دیکھا اورپڑھے لکھے لوگوں ، علماء ، پروفیسرز اور ملک کے دیگر حصوں سے باوثوق شہادات کو جمع کرنے کے بعد میں اعلان کرتا ہوں کہ ہمیں ڈیرہ اسمائیل خان ، تھرپارکر ، حید ر�آباد ، شکارپور ، جہانیاں ، میر پورخاص اور لاہور سمیت متعدد مقامات پر چاند نظر آنے کی شہادات موصول ہوئی ہیں جن پر اتفاق رائے سے فیصلہ کیا گیا کہ عیدالفطر کا چاند نظر آگیا ہے کہ اور عید الفطر آج بروز( بدھ ) کو ہوگی ۔ تفصیلات کے مطابق چیئرمین مرکزی رویت ہلال کمیٹی مفتی منیب الرحمان کی سربراہی میں شوال المکرم کا چاند دیکھنے کے لیے ایوان اوقاف لاہور میں 15 سال بعد کمیٹی کا اجلاس منعقد ہو ا جس میں دیگر مکاتب فکر کے علمائے کرام اور محکمہ موسمیات کے حکام سمیت ماہرین فلکیات نے بھی شرکت کی جبکہ زونل کمیٹیوں کے اجلاس اسلام آباد ، کراچی ، پشاور اور کوئٹہ میں ہوئے ۔ اس موقع پر چےئرمین مرکزی رویت حلال کمیٹی نے سعودی اور مدینہ منورہ میں ہونے والے دہشت گردی کے واقعات کی پرزورمذمت کرتے ہوئے کہاکہ مدینہ منورہ کی حرمت کو پامال کرنا پوری امت مسلمہ کو مجروح کرنا اور انسانیت کی روح کو عزیت سے دوچارکرنے کے برابر ہے ۔انہوں نے کہاکہ میں مدینہ منورہ میں ہونے والے دہشت گردی کے واقعات کی پرزورمذمت کرتاہوں اورپاکستان کاہر مسلمان شدید ترین مذمت کرتا ہے ۔ انہوں نے کہاکہ ایسے واقعات کے پیچھے چھپے دہشت گرد عبرت ناک سزا کے مستحق ہیں۔ انہوں نے کہاکہ میں دیگر اسلامی ممالک کے سربراہان سے بھی درخواست کرتاہوں کہ اپنے ممالک کی سکیورٹی کے نظام کو مزید پختہ کریں تاکہ اس قسم کے واقعات کا سدباب کیا جاسکے ۔ انہوں نے کہاکہ دعا ہے کہ اللہ سب کو اپنے حفظ امان میں رکھے