کراچی(مانیٹرنگ ڈیسک)امجد صابری کے قتل کے اشارے مقامی سطح پر ملنے کے بعدرینجرز کو کراچی میں قانون شکن عناصر کے خلاف فری ہینڈ دینے کا فیصلہ کرلیا گیا ہے ،حکومت سندھ نے رینجرز کو کراچی میں قانون شکن عناصر کے خلاف فری ہینڈ دینے کا فیصلہ کرلیا ہے۔ وزیراعلیٰ سندھ قائم علی شاہ نے بدھ کو رات گئے رینجرز ہیڈکوارٹرز میں منعقدہ اجلاس میں سخت فیصلوں کی منظوری دے دی ہے۔اجلاس میں ڈی جی رینجرز نے وزیراعلی سندھ کو امجد صابری کے قتل سے متعلق آگاہ کیا۔ ذرائع کے مطابق حساس اداروں نے ابتدائی رپورٹ وزیراعلی سندھ کو دے دی۔امجد صابری کے قتل کے اشارے مقامی سطح پر مل رہے ہیں جس کے بعد شہر میں بڑے پیمانے پر کارروائیوں کا فیصلہ کیا گیا ہے۔ ڈی جی رینجرز اور آئی جی سندھ نے رینجرز اور پولیس کے مابین رابطہ کمیٹی قائم کردی جو روزانہ کی بنیاد پر خفیہ معلومات کا تبادلہ کرے گی۔چیف جسٹس کے بیٹے سے متعلق حساس اداروں کی رپورٹ بھی وزیراعلی کو پیش کی گئی جس میں انکشاف کیا گیا کہ اغواکار چیف جسٹس کے بیٹے کو صوبہ سندھ سے باہر منتقل کرچکے ہیں۔ چیف جسٹس کے بیٹے کو خیبر پختونخوا میں منتقل کئے جانے کا خدشہ ظاہر کیا گیا ہے۔