اسلام آباد (این این آئی ) وفاقی وزیر چوہدری نثارعلی خان نے زیرِحراست ملزمان کی ویڈیو لیکس بند کرنے پر زور دیتے ہوئے واضح کیا ہے کہ زیرحراست ملزمان کی ویڈیو لیکس سے متعلق عدالتی کمیشن صرف صوبائی حکومت بنا سکتی ہے، وفاقی حکومت ہر ممکن تعاون فراہم کریگی۔ پیر کو قومی اسمبلی میں نکتہ اعتراض پر چوہدری نثار نے کہا کہ وزارت داخلہ کے کردار کے حوالے سے سوال کیا جاتا ہے اگر کوئی عدالتی کمیشن قائم ہونا مقصود ہے تو وزارت داخلہ اور وفاقی حکومت کسی بھی صوبے میں مداخلت نہیں کر سکتی۔سندھ حکومت کو تحقیقات کے لیے لکھا ہے۔ انہوں نے کہا کہ اسمبلی روایات کے مطابق کٹوتی کی تحریکوں پر اتنی تفصیلی بحث نہیں ہوتی ۔آئین اور قانون کو مدنظر رکھنا چاہئے کسی بھی صوبے کے اندر انتظامی ذمہ داری صوبے کی ہوتی ہے ۔وزیر داخلہ نے ملزمان کی ویڈیو لیکس کو عدالتی سسٹم کی تضحیک قرار دیا اور کہا کہ زیر تفتیش لوگوں کا میڈیا ٹرائل انصاف کا قتل ہے ۔چوہدری نثار علی خان نے ویڈ یو لیکس پر سندھ حکومت کو مکمل تعاون کی پیشکش کرتے ہوئے درخواست کی کہ اس معاملہ کو سیاسی نہ بنایا جائے۔