لاہور( این این آئی)پاکستان تحریک انصاف کے سربراہ عمران خان نے کہا ہے کہ پوری قوم پانامہ لیکس کے معاملے کو منطقی انجام تک پہنچانے کی خواہشمند ہے ،مہنگائی اوربیروزگاری سمیت دیگر گھمبیر مسائل میں گھری عوام کے صبر کا پیمانہ لبریز ہو گیا ہے ،ٹی او آرز کی تشکیل کے معاملے میں ڈیڈلاک کی ذمہ داری حکومت پر عائد ہوتی ہے ۔ ان خیالات کا اظہار انہوں نے گزشتہ روز لاہور میں پارٹی رہنماؤں سے غیر رسمی ملاقات کے دوران گفتگو کرتے ہوئے کیا ۔ ذرائع کے مطابق اس دوران پارٹی کے امور سمیت آئندہ کے لائحہ عمل بارے بھی گفتگو کی گئی ۔ عمران خان کا مزید کہنا تھاکہ حکمران یہ سمجھ رہے ہیں کہ وہ تاخیری حربے اختیار کر کے پانامہ لیکس کے معاملے سے جان چھڑا لیں گے تو یہ انکی بھول ہے۔ پوری قوم اسے منطقی انجام تک پہنچانا چاہتی ہے۔ انہوں نے کہا کہ اگر شریف خاندان نے قوم کے پیسے کی چوری نہیں کی تو پھر انہیں ڈر کیوں لگ رہا ہے ۔ اگر شریف خاندان کے ہاتھ صاف ہیں تو انہیں بر ملا طور پر اپنے اپنے سے احتساب کے عمل کا آغاز کرنے کی پیشکش کرنی چاہیے ۔ عمران خان نے کہا کہ آج عوام غریب سے غریب تر ہوتے جارہے ہیں،عوام کو صحت ، تعلیم اور پینے کے صاف پانی کی بنیادی ضرورتیں میسر نہیں جبکہ حکمران ایسا تاثر دے رہے ہیں جیسے ملک میں دودھ اور شہد کی نہریں بہاد ی گئی ہوں ۔