اسلام آباد(این این آئی)وزیراعظم محمدنوازشریف نے کہاہے کہ رمضان کامہینہ اللہ تعالیٰ کی طرف سے رحمت ،مغفرت اور نجات کی بشارت لے کر آتا ہے ، مقدس مہینے کی آمد کے موقع پر میں وطن سے دور ہوں مگر میرا دل وطن اور اہل وطن کیلئے دھڑکتا ہے، بہت جلد آپ لوگوں کے درمیان ہوں گا، ملک و قوم کی سلامتی،امن،ترقی اور خوشحالی کے لیے خصوصی دُعائیں کریں۔رمضان المبارک کے موقع پروزیراعظم نے قوم کو مبارکباد دیتے ہوئے اپنے پیغام میں کہاکہ ’’اللہ کے فضل و کرم اور اہل وطن کی دعاؤں کی برکت سے میں صحتیاب ہو رہا ہوں۔ اس بار رمضان المبارک کے مقدس مہینے کی آمد کے موقع پر میں وطن سے دور ہوں مگر میرا دل وطن اور اہل وطن کے لئے دھڑکتا ہے۔ انشاء اللہ بہت جلد آپ لوگوں کے درمیان ہوں گا۔میں آپ سب کو اس ماہ مقدس کی آمد پر مبارک باد پیش کرتا ہوں۔یہ مہینہ اللہ تعالیٰ کی طرف سے رحمت ،مغفرت اور نجات کی بشارت لے کر آتا ہے ۔روزہ ایک ایسی عبادت ہے جس کے بارے میں اللہ کا فرمان ہے کہ روزہ میرے لئے ہے اور اس کا اجر بھی میں ہی دوں گا۔اس مہینے میں عبادات اور دعاؤں کی قبولیت ہوتی ہے ۔ میری آ پ سب سے درخواست ہے کہ اس مقدس مہینے میں وطن عزیز کی مزید بہتری کے لئے خصوصی دعائیں کریں۔آپ کی حکومت عملی طور پر ایسی پالیسیاں اختیار کر رہی ہے جن سے اقتصادی ،معاشرتی اور دفاعی کامیابیاں حاصل ہو رہی ہیں۔ انشاء اللہ آپ کی دُعاؤں سے پاکستان مضبوط اور مستحکم ہو گا۔اہلیان وطن سے التماس ہے کہ وہ بالخصوص سحری و افطاری اور تراویح میں اپنے ملک و قوم کی سلامتی،امن،ترقی اور خوشحالی کے لیے خصوصی دُعائیں کریں تاکہ ہمارا وطن ہر قسم کی بیرونی سازشوں سے محفوظ رہے اور ترقی وکامرانی اس کا مقدر بنے۔