کراچی (این این آئی) پاکستان پیپلزپارٹی پارلیمنٹرینز کے صدر اور سابق صدر پاکستان آصف علی زرداری نے مولانا فضل الرحمن سے ملاقات کی تردید کرتے ہوئے کہا کہ احتساب کا عمل سب سے پہلے وزیراعظم کے خاندان سے شروع کیا جائے۔ پانامہ لیکس کے معاملے پر وزیراعظم سے کوئی مفاہمت نہیں ہوئی ہے اس معاملے پر میرا اور پارٹی کا موقف ایک ہے۔ پانامہ لیکس کے معاملے کو نظرانداز کرنے کا سوال ہی پیدا نہیں ہوتا۔ ان خیالات کا اظہار انہوں نے اتوار کو دبئی میں میڈیا سے بات چیت کرتے ہوئے کیا۔ انہوں نے کہا کہ پانامہ لیکس کے معاملے پر دوسری جماعتوں سے بھی مشاور کی گئی ہے اس بارے میں تمام خبریں بے بنیاد ہیں۔ پیپلزپارٹی پانامہ لیکس کے معاملے کو اٹھانے کا فیصلہ کرچکی ہے۔ انہوں نے کہا کہ میری لندن میں مولانا فضل الرحمن سے لندن میں کوئی ملاقات نہیں ہوئی ہے۔ سابق صدر نے کہا کہ پانامہ لیکس کا معاملہ حل ہونے تک چین سے نہیں بیٹھیں گے۔ حکومت کو اس معاملے پر اپنا پوزیشن واضح کرنا ہوگی۔ آصف زرداری نے کہا کہ ہمارا مطالبہ ہے کہ احتساب کا عمل سب سے پہلے وزیراعظم کے خاندان سے شروع کیا جائے۔ انہوں نے کہا کہ وزیراعظم سے پانامہ لیکس کے معاملے پر کوئی مفاہمت نہیں ہوئی ہے اس معاملے پر میرا اور پارٹی کا موقف ایک ہے۔