سوات (آن لائن) خیبر پختونخوا کے مختلف علاقوں میں زلزلے کے جھٹکے محسوس کیے گئے ،ریکٹر اسکیل پر زلزلے کی شدت 4.7جبکہ گہرائی 194کلو میٹر زیر زمین ریکارڈ کی گئی ہے۔میڈیا رپورٹس کے مطابق اتوار کی دوپہر خیبر پختونخوا کے علاقے سوات اور گردونواح میں زلزلے کے شدید جھٹکے محسوس کیے گئے،جس کے بعد علاقے میں شدید خوف و ہراس پھیل گیا اور لوگ استغفار اور کلمہ طیبہ کا ورد کرتے ہوئے گھروں سے باہر نکل آئے،تاہم زلزلے کی وجہ سے کسی جانی یا مالی نقصان کی اطلاع موصول نہیں ہوئی۔زلزلہ پیما مرکز کے مطابق زلزلے کی شدت 4 اعشاریہ 7محسوس کی گئی جبکہ زلزلے کا مرکز کوہ ہندوکش کا پہاڑی سلسلہ تھا جہاں زلزلے کی گہرائی 194 کلومیٹر زیر زمین ریکارڈ ہوئی ہے۔زلزلہ پیما مرکزحکام نے بتایا کہ زلزلہ اتنی شدید نوعیت کا نہیں تھا، چونکہ زلزلے کی گہرائی بہت زیادہ تھی جس کی وجہ سے جانی و مالی نقصان کا اندیشہ بہت کم ہے۔حکام نے مزید بتایا کہ خدانخواستہ اگرزلزلے کی گہرائی کم ہوتی تو بڑے پیمانے پر تباہی پھیلنے کا خدشہ تھا۔