اسلام آباد ( آئی این پی ) پاکستان تحریک انصاف کے چیئرمین عمران خان نے کہا ہے کہ شریف خاندان پانامہ معاملے میں آکر پھنس گئے ہیں ، نواز شریف کے ساتھ جو ملے گا قوم کے سامنے بے نقاب ہو جائے گا، آصف زرداری نے 2014 کے دھرنے میں نواز شریف کی مدد کی اور ابھی تک پچھتا رہے ہیں اور مجھے نہیں لگتا کہ اب وہ دوبارہ نواز شریف کا ساتھ دیں گے کیونکہ نواز شریف استعمال کرنے کے بعد لوگوں کو ٹشو پیپر کی طرح پھینک دیتے ہیں ۔ وہ جمعرات کو نجی ٹی وی پروگرام کو انٹرویو دے رہے تھے ۔ انہوں نے کہا کہ نواز شریف کے ساتھ جو ملے گا قوم کے سامنے بے نقاب ہو جائے گا ۔ شریف خاندان پانامہ معاملے میں پھنس گیا ہے ۔ عمران خان نے کہا کہ آصف زرداری نے ہمارے 2014 کے دھرنے کے وقت نواز شریف کو بچا لیا تھا مگر اب وہ بھی ان کا ساتھ نہیں دینگے۔ میاں صاحب نے دھرنے کے دوران پیپلز پارٹی کو استعمال کیا اور بعد میں ڈاکٹر عاصم کیس میں ان کا ساتھ نہیں دیا۔ انہوں نے کہا کہ نواز شریف لوگوں کو استعمال کرنے کے بعد ٹشو پیپر کی طرح پھینک دیتے ہیں ۔ میاں صاحب نے آصف زرداری کے باہر جانے کے بعد بھی ان کی کوئی مدد نہیں کی ۔ پاکستان میں ہر صورت کرپٹ افراد کا احتساب ہونا چاہیے ۔عمران خان نے کہا کہ پانامہ معاملے میں دنیا بھر میں انکوائری ہو رہی ہے اور ہم احتساب کے عمل کے لئے سب کو ساتھ لے کر چل رہے ہیں ۔ یہ بات اپنے ذہن سے نکال دیں کہ تحریک انصاف اب پیچھے ہٹ جائے گی اگر کوئی سیاسی پارٹی ساتھ نہ بھی دے تو بھی ہم احتساب کروانے کے لئے آخر تک جائیں گے ۔ انہوں نے کہا کہ موجودہ دور مشرف دور سے زیادہ برا ہے ۔ خیبر پختونخوا میں جس سیٹ پر ہارے وہاں پہلے بھی تیسرے نمبر پر ہی تھے ۔ چیئرمین تحریک انصاف نے کہا کہ ابھی تک نواز شریف آصف زرداری کے پیچھے چھپے ہوئے تھے مگر اب کھل کر شریف خاندان کی کرپشن لوگوں کے سامنے آرہی ہے ۔ انہوں نے کہا کہ تین اگست2012 کو اپنے فلیٹ کی تفصیلات بتائیں تھیں ۔ میں 1971 سے کاؤنٹی کرکٹ کھیل رہا تھا ۔ میری ڈکلیئرڈ آمدن تھی ۔ میں توبرطانوی شہری نہیں تھا اس لئے آف شور کمپنی بنائی تاکہ ٹیکس بچایا جا سکے ۔ عمران خان نے کہا کہ نواز شریف کی بیرون ملک اربوں روپے کی جائیدادیں ہیں ۔ نواز شریف نے اربوں کی جائیداد کے باوجود آف شور کمپنیز بنائیں ۔ میری تمام ٹیکس ریٹرنز 1982 سے اب تک کی موجود ہیں ۔ باہر رہ کر اپنی حلال کمائی سے رقم پاکستان لے کر آیا ہوں۔