راولپنڈی (این این آئی)چیف آف آرمی سٹاف جنرل راحیل شریف نے بلوچستان میں ڈرون حملے پر سخت تشویش کا اظہار کرتے ہوئے امریکی سفیرپر واضح کیا ہے کہ پاکستانی خود مختاری کی خلاف ورزی کے اقدامات دونوں ممالک کے تعلقات اور علاقائی استحکام کیلئے جاری امن عمل کیلئے نقصان دہ ہیں ۔ آئی ایس پی آر کے مطابق چیف آف آرمی سٹال جنرل راحیل شریف سے پاکستان میں امریکی سفیر ڈیوڈ ہیل نے بدھ کو جی ایچ کیو میں ملاقات کی ۔ملاقات کے دور ان 22مئی کو بلوچستان میں امریکی ڈرون حملے کے بعد پیدا ہونے والی صورتحال زیر غور لائی گئی ۔آرمی چیف نے ڈرون حملے پر اپنی سخت تشویش کااظہار کرتے ہوئے کہاکہ پاکستانی خود مختاری کی خلاف ورزی کے ایسے اقدامات دونوں ممالک کے تعلقات کیلئے نقصان دہ ہیں اور علاقائی استحکام کیلئے جاری امن عمل کو بھی نقصان پہنچائیں گے ۔پاکستان فوج کے سربراہ نے امریکی سفیر کو بتایا کہ دہشتگردی کے خلاف جنگ میں پاکستان کی کامیابیاں اور قربانیاں بے مثال ہیں ۔