لاہور ( این این آئی) وزیر اعظم محمد نوازشریف کے بیرون ملک علاج پر پابندی عائد کرنے کے لئے لاہور ہائیکورٹ میں درخواست دائر کر دی گئی۔بیرسٹر سید محمد جاوید اقبال جعفری کی جانب سے دائر کی گئی درخواست میں موقف اختیار کیا گیا ہے کہ وزیر اعظم نواز شریف سرکاری ہسپتالوں میں اپناعلاج معالجہ کرانے کی بجائے سرکاری خرچ سے بیرون ملک علاج کو ترجیح دیتے ہیں ۔وزیر اعظم کے بیرون ملک علاج پر قومی خزانے کی بھاری رقم خرچ کی جاتی ہے جو کہ عام پاکستانیوں اور سرکاری ہسپتالوں میں زیرعلاج مریضوں سے امتیازی سلوک کے مترادف ہے۔سرکاری ہسپتالوں میں موجود مریض ادویات اور بنیادی سہولیات کے لئے ترستے ہیں مگر وزیر اعظم قومی خزانے پہ بوجھ ڈال رہے ہیں۔ لہٰذا معزز عدالت سے استدعا ہے کہ وزیر اعظم نوازشریف کے بیرون ملک علاج پر پابندی عائد کرنے کے احکامات صادر کئے جائیں۔