اسلام آباد (آئی این پی) متحدہ اپوزیشن نے وزیراعظم کی تقریر کے بعد گھٹنے ٹیک دیئے اور قومی اسمبلی و سینیٹ کا بائیکاٹ ختم کرتے ہوئے ٹی او آرزپر اتفاق رائے کیلئے پارلیمانی کمیٹی کے قیام کی تجویز کو تسلیم کرلیا۔ منگل کو یہاں پیپلز پارٹی کے رہنماء سینیٹر اعتزاز احسن کے چیمبر میں اپوزیشن جماعتوں کا اجلاس ہوا۔ جس میں چوہدری پرویز الٰہی، شیخ رشید، اے این پی کے حاجی غلام احمد بلور، سید خورشید شاہ،جماعت اسلامی کے امیر سینیٹر سراج الحق نے شرکت کی جبکہ ایم کیو ایم نے تحفظات کا اظہار کرتے ہوئے اجلاس کا بائیکاٹ کیا۔ ذرائع کے مطابق اپوزیشن جماعتوں نے اسپیکر کی یقین دہانی کے بعد قومی اسمبلی اور سینیٹ کا بائیکاٹ ختم کرنے کا اعلان کیا ہے اور تمام اپوزیشن جماعتیں بدھ سے دونوں ایوانوں میں شرکت کریں گے، اپوزیشن دونوں ایوانوں میں 70سوالات سے متعلق بات کرے گی اور وزیراعظم سے نئے سوال نامے کا جواب لینے کی کوشش کی جائے گی۔