لاہور( نیوز ڈیسک ) لاہورہائی کورٹ نے وزیراعظم نواز شریف کی نااہلی کی درخواست پر فیصلہ نہ کرنے پر الیکشن کمیشن کو نوٹس جاری کر دیئے۔لاہور ہائیکورٹ نے سید اقتدار حیدر کی درخواست پر سماعت کی جس میں الیکشن کمیشن کی جانب سے وزیر اعظم نوازشریف کے خلاف درخواست پر فیصلہ نہ کرنے کے اقدام جو چیلنج کیا گیا۔ درخواست میں کہا گیا کہ وزیراعظم نواز شریف آئین کے آرٹیکل باسٹھ تریسٹھ پر پورا نہیں اترتے،، اس لئے ان کی نااہلی کے لئے الیکشن کمیشن کو درخواست دی۔ لیکن الیکشن کمیشن نے درخواست پر کوئی کارروائی نہیں کی ۔درخواست گزار کا کہنا تھا کہ پاناما لیکس کے انکشافات کے بعد نوازشریف وزیراعظم کے عہدے کے اہل نہیں رہے۔ عدالت الیکشن کمیشن کو وزیراعظم کی نااہلی کی درخواست پر فیصلہ کرنے کا حکم دے۔لاہور ہائی کورٹ نے درخواست پر الیکشن کمیشن کو نوٹس جاری کر دیئے۔