لاہور (نیوز ڈیسک ) وزیر اعلیٰ پنجاب محمد شہباز شریف نے لاہور اورنج لائن میٹرو ٹرین کے منصوبے کے روٹ کا اچانک دورہ کیا ، انہوں نے کہا کہ منصوبے کی تکمیل سے ٹرانسپورٹ کے شعبہ میں انقلاب برپا ہوگا۔ وزیر اعلیٰ پنجاب نے لاہور اورنج لائن میٹرو ٹرین کے منصوبے کے روٹ کا اچانک دورہ کیا اور روٹ پر منصوبے کے سول ورکس پر پیش رفت کا جائزہ لیا۔ اس موقع پر شہریوں اور دکانداروں سے گفتگو میں ان کا کہنا تھا کہ میٹرو ٹرین کا منصوبہ عام آدمی کو باکفایت اور عالمی معیار کی تیز رفتار سفری سہولتیں فراہم کرے گا۔ منصوبے کی تکمیل سے ٹرانسپورٹ کے شعبہ میں انقلاب برپا ہوگا۔ ایک شہری کا کہنا تھا کہ دعا ہے یہ منصوبہ جلد مکمل ہو اور تمام رکاوٹیں دور ہوں۔ وزیر اعلیٰ پنجاب محمد شہباز شریف کی زیرصدارت اورنج لائن میٹرو ٹرین کے منصوبے پر اجلاس بھی ہوا جس میں محمد شہباز شریف نے سول ورکس کو بہترین معیار کے ساتھ بروقت مکمل کرنے کی ہدایت کی۔