کراچی ( نیوزڈیسک ) کراچی کے حلقے این اے 245 کے ضمنی الیکشن میں تحریک انصاف کے لیے بڑا دھچکا ، پی ٹی آئی کے امیدوار امجد اللہ خان پولنگ سے چند گھنٹے قبل متحدہ امیدوار کے حق میں دستبردار ہوگئے اور ایم کیو ایم میں شمولیت کا اعلان کردیا ، کہتے ہیں انتخابات میں اکیلا چھوڑ دیا گیا ، عمران خان نے ایک مرتبہ بھی فون کرکے صورتحال معلوم کرنے کی کوشش نہیں کی۔ کراچی کے حلقے این اے 245 کا ضمنی الیکشن پی ٹی آئی کے لیے بن گیا ٹینشن ، تحریک انصاف کے امیدوار امجد اللہ خان نے رات ڈھائی بجے کے قریب ، نائن زیرو پر پریس کانفرنس میں ایم کیو ایم کے امیدوار کمال ملک کے حق میں دستبردار ہونے کا اعلان کردیا۔ پریس کانفرنس میں امجد اللہ خان نے شکایات کی پٹاری کھول دی ، کہتے ہیں کہ مقامی قیادت نے الیکشن میں کسی قسم کا تعاون نہیں کیا۔ امجد اللہ خان اس موقع پر عمران خان سے بھی نالاں نظرآئے۔ ان کا کہنا تھا کہ چیئرمین پی ٹی آئی اچھے انسان ہیں لیکن پارٹی چلانا ان کے بس کی بات نہیں۔ متحدہ کے ردعمل میں تحریک انصاف نے پریس کانفرنس رکھی مگر کارکنوں کے آپس میں جھگڑے کے باعث منسوخ کردی گئی۔ اس موقعے پر میڈیا کو بھی کوریج سے روک دیا اور صحافیوں کو وہاں سے بدتمیزی کرکے نکال دیا گیا۔