لندن(نیوز ڈیسک)پاکستان کے ایجوکیشن سیکٹر میں70 کروڑ پاو نڈز سالانہ امداد کرپشن کی نذر ہونے کا خدشہ ہے،پاکستان میں تعلیم کے شعبے میں کرپشن پر برطانیہ میں بھی تشویش کا اظہار کیا جانے لگا۔ پاکستان کے ایجوکیشن سیکٹر کو فنڈز دینے والا بڑا ملک برطانیہ کرپشن اسکینڈلز پر پریشان ہو گیا ہے۔ سندھ اور پنجاب کے ایجوکیشن سیکٹر میں کرپشن کا چرچا برطانوی ذرائع ابلاغ میں بھی شروع ہو گیا ہے۔ برطانوی حکام نے سر پکڑ لئے۔ آڈیٹرجنرل کی رپورٹ کے مطابق، پنجاب میں ہائیر ایجوکیشن کے شعبے میں ساڑھے 3 کروڑ پاو نڈ کی کرپشن ہوئی ہے۔ برطانیہ نے پنجاب میں تعلیم کی بہتری کیلئے 38 کروڑ پاونڈ دیئے۔ برطانوی میڈیا میں چھپنے والی رپورٹس میں اس امر پر تشویش کا اظہار کیا گیا ہے کہ نیب تحقیقات کے باوجود رانا مشہود اب تک وزیر تعلیم کیوں ہیں۔دوسری جانب برطانوی میڈیا رپورٹس میں یہ دعویٰ بھی کیا گیا ہے کہ سندھ میں 5 ہزار سکول اور 40 ہزار اساتذہ صرف کاغذوں میں موجود ہیں۔صوبائی حکومتوں سے مایوس ہونے کے بعد برطانوی حکام نے پرائیویٹ سکولز کو فنڈز فراہم کئے لیکن پرائیویٹ سکولوں کے کارناموں پر بھی برٹش ڈیپارٹمنٹ فار انٹرنیشنل ڈویلپمنٹ میں شدید تشویش پائی جاتی ہے کیونکہ فنڈز لینے والے پرائیویٹ سکول ساتذہ کو کم از کم تنخواہ بھی نہیں دے رہے۔