اسلام آباد (نیوز ڈیسک) پاکستان نے بلوچستان سے گرفتار ہونے والے ”را“ ایجنٹ ”کلبھوشن“ کا معاملہ عالمی برادری کے سامنے اٹھا دیا ۔تفصیلات کے مطابق امریکہ، برطانیہ، فرانس، چین میں پاکستانی سفیروں نے ان ممالک کے متعلقہ حکام کو بلوچستان سے گرفتار ہونے والے ”را“ ایجنٹ سے متعلق معلومات فراہم کیں اور اس حوالے سے پاکستان کے موقف سے آگاہ کیا۔ ذرائع کے مطابق پاکستانی سفیروں نے ”را“ ایجنٹ کی گرفتاری کی تفصیلات بھی عالمی برادری تک پہنچا دی ہیں اور اس حوالے سے اپنی رپورٹ دفتر خارجہ کو بھجوا دی ہیں۔ نجی ٹی وی کے مطابق دفتر خارجہ نے مختلف ممالک میں تعینات پاکستانی سفراءکو یہ معاملہ ان ممالک کے متعلقہ حکام کے سامنے اٹھانے اور اپنی رپورٹس 31 مارچ کو دفتر خارجہ کو بھجوانے کا حکم دیا تھا جس پر عملدرآمد ہو گیا اور مختلف ممالک سے پاکستانی سفیروں کی رپورٹس موصول ہو گئی ہیں۔واضح رہے کہ چند دن قبل سیکیورٹی فورسز نے بلوچستان میں کامیاب کارروائی کرتے ہوئے بھارتی خفیہ ایجنسی ”را“ کے حاضر سروس ایجنٹ کو گرفتار کیا تھا جس نے تفتیش کے دوران چونکا دینے والے انکشافات کئے تھے۔