لاہور (نیوزڈیسک)امیر جماعت اسلامی پاکستان سینیٹر سراج الحق نے ممتاز قادری کو پھانسی دینے کی شدید مذمت کی ہے ۔ انہوں نے کہاکہ صدر مملکت اور حکومت نے علما ءکا پورا موقف بھی نہیں سنا اور ممتاز قادری کو سزائے موت دے دی گئی ،ممتاز قادری کی سزائے موت کے خلاف احتجاج کیا جائے ۔ سراج الحق نے ممتاز قادری شہید کی بلندی ¿ درجات کی دعا کی ہے اور شہید کے لواحقین سے دلی تعزیت اور ہمدردی کا اظہار کیاہے ۔ نائب امیر جماعت اسلامی حافظ محمد ادریس ، میاں محمد اسلم ، راشد نسیم، اسد اللہ بھٹو ،سیکرٹری جنرل جماعت اسلامی پاکستان لیاقت بلوچ اور ڈپٹی سیکرٹری جنرل ڈاکٹر فرید احمد پراچہ نے بھی ممتاز قادری کو پھانسی دینے کی شدید مذمت کی ہے ۔انہوں نے کہاکہ پھانسی کی سزاکے سینکڑوں قیدیوں کے مقدمات عدالتوں میں زیر سماعت ہیں لیکن ممتاز قادری کو اپنے مغربی آقاﺅں کے اشاروں پر عجلت میں پھانسی د ے کر عاشقان رسول کے جذبات کو مجروح کیا گیاہے ۔ انہوں نے کہاکہ حکمران مسلسل ایسے اقدامات کر رہے ہیں کہ جن سے واضح ہوتاہے کہ حکمران امریکہ کو خوش کرنے کے لیے اللہ ، اس کے رسول اور اسلامیان پاکستان کو ناراض کرنے میں جری اور بے باک ہو گئے ہیں۔ انہوں نے کہاکہ تمام محب وطن اور اسلام دوست عوام کو نبی پاک کے سپاہی کی شہادت کیخلاف بھر پور احتجاج کرناچاہیے۔ انہوں نے ممتاز قادری کے لیے مغفرت اور پسماندگان سے ہمدردی اور تعزیت کا اظہار کیاہے۔ دریں اثنا سیکرٹری لیاقت بلوچ نے ممتاز قادری کے بھائی دل پذیر اعوان سے فون پر رابطہ کر کے ان سے ممتاز قادری کی پھانسی پر اظہار تعزیت اور دعائے مغفرت کی ۔