اسلام آباد (نیوز ڈیسک) شمالی وزیرستان کے علاقے شوال میں شہید ہونے والے پاک فوج کے کیپٹن عمیر کا آخری پیغام منظر عام پر آگیا جس میں انہوں نے کہا کہ قوم ہم سے امید رکھے ‘ آپریشن کے آخری مرحلے میں بھی کامیاب ہونگے۔ اتوار کو شوال میں شہید ہونے والے پاک فوج کے کیپٹن عمیر کی ویڈیو جسے کیپٹن عمیر کے بہنوئی نے ریکارڈ کیا تھا منظر عام پر آگئی ہے۔ میڈیا رپورٹس کے مطابق ریکارڈ کی گئی ویڈیو میں کیپٹن عمیر شہید نے دہشت گردوں کو جڑ سے اکھاڑ پھینکنے کے عزم کا اظہار کرتے ہوئے کہا کہ قوم ہم سے امید رکھے‘ انشاء اﷲ آپریشن کے آخری مرحلے میں بھی کامیاب ہونگے۔ کیپٹن عمیر کے چچا طاہر عباسی نے کہا ہے کہ عمیر پاک فوج میں تو کیپٹن تھا لیکن جنت میں جنرل بن کر گیا ہے۔ پورے خاندان کو شہید کی قربانی پر فخر ہے‘ اس ملک کی خاطر جانوں کا نذرانہ پیش کرتے رہیں گے۔