کراچی(نیوز ڈیسک)وزیراعظم نواز شریف گرین لائن میٹرو بس کے منصوبے کا سنگ بنیاد رکھنے کے لئے کراچی پہنچ گئے۔گرین لائن میگا ٹرانزنٹ منصوبے کا سنگ بنیاد رکھنے کے لئے وزیراعظم نواز شریف کراچی پہنچے تو وزیراعلیٰ سندھ سید قائم علی شاہ اور گورنر ڈاکٹر عشرت العباد نے ان کا استقبال کیا۔وزیراعظم ہاؤس کی جانب سے جاری بیان میں کہا گیا ہے کہ وزیراعظم کراچی میں 22 کلو میٹر طویل گرین لائن میٹرو بس منصوبے کا سنگ بنیاد رکھیں گے، منصوبہ ایک سال میں مکمل ہو گا اور اس پر کل 16 ارب روپے لاگت آئے گی، منصوبے کے تمام تر اخراجاب وفاقی حکومت برداشت کرے گی۔گرین لائن میٹرو بس منصوبے کا روٹ سرجانی ٹاؤن سے شروع ہو گا جو ناگن چورنگی، ناظم آباد چورنگی، لسبیلہ اور گرومندر سے ہوتا ہوا ایم اے جناح روڈ پر اختتام پزیر ہو گا۔ گرین لائن منصوبے کے ذریعے روزانہ 3 لاکھ شہری مستفید ہو سکیں گے۔