اسلام آباد (نیوزڈیسک) وزیراعظم نواز شریف منگل کو پارلیمنٹ ہائوس میں نصب کیے گئے شمسی توانائی کے نظام کا افتتاح کریں گے۔ اس نئے نظام کے نصب ہونے سے پاکستان کی پارلیمنٹ دنیا کی پہلی پارلیمنٹ بن گئی ہے جو اپنی ضروریات کے مطابق شمسی پینلز کے ذریعے بجلی پیدا کر سکتی ہے۔ پارلیمنٹ ہائوس نیشنل گرڈ کو بھی بجلی فراہم کر رہا ہے اور گزشتہ ہفتے تک اس کا نظام شمسی 100 میگاواٹ بجلی پیدا کر چکا تھا۔ یہ نظام چینی ماہرین نے نصب کیا ہے اور یہ نظام چینی حکومت نے قومی اسمبلی کے اسپیکر سردار ایاز صادق کی کوششوں سے مفت فراہم کیا ہے۔جنگ رپورٹر کے صالح ظافرکے مطابق سول پینلز پارلیمنٹ ہائوس کے کار پارکنگ ایریا اور چھت پر نصب کیے گئے ہیں۔ دلچسپ بات یہ ہے کہ اسرائیل کی پارلیمنٹ (کنست) میں بھی نظام شمسی نصب ہے لیکن یہ نظام اپنی ضرورت کی صرف 10؍ فیصد بجلی پیدا کر سکتا ہے۔ وزیراعظم نواز شریف منگل کو پارلیمنٹ ہائوس کی تیسری منزل پر بٹن دبا کر پورے نظام کو شمسی سسٹم پر منتقل کریں گے۔ چینی سفیر سون وائیڈونگ، چیئرمین سینیٹ میاں رضا ربانی اور تمام پارلیمانی گروپس کے رہنما اس موقع پر موجود ہوں گے۔ سرپلس بجلی کیلئے پارلیمنٹ ہائوس قومی گرڈ سے رقم وصول نہیں کرے گا کیونکہ اخراجات کو اس وقت کیلئے ایڈجسٹ کیا جائے گا جب قومی اسمبلی کی بجلی کی ضروریات بڑھ جائیں گی یا پھر شمسی نظام سے کم بجلی پیدا ہوگی۔ اسی دوران ذرائع نے بتایا ہے کہ وزیراعظم نواز شریف قومی اسمبلی کے جاری سیشن میں بھی شرکت کریں گے۔ اجلاس اپوزیشن کے مطالبے پر ایل این جی معاہدے اور پی آئی اے کے امور پر بحث و مباحثے کیلئے طلب کیا گیا تھا۔