راولپنڈی (نیوز ڈیسک) پاکستان مسلم لیگ (ن) کی رہنمامریم نواز نے کہا ہے کہ تمام اسپتالوں میں ہیلتھ ریفارمز کرنے کا اُنہوں نے عزم کر لیا ہے۔ وہ ہیلتھ کیئر سیکٹر اور سرکاری اسپتالوں میں غریبوں کے بہترین مفاد میں اہم تبدیلیاں لانے کیلئے اپنی تمام تر صلاحیتیں بروئے کار لائینگی۔ محترمہ مریم نواز پیر کو پمز ہسپتال (پاکستان انسٹی ٹیوٹ آف میڈیکل سائنسز) کے اچانک جامع دورے کے دوران پمز انتظامیہ‘ ڈاکٹروں‘ عملے اور مریضوں کے لواحقین سے غیررسمی گفتگو کر رہی تھیں۔ اس دورے کے دوران آنسہ مریم نواز کے ہمراہ بیرسٹر دانیال چوہدری‘ وزیر مملکت کیڈ ڈاکٹر طارق فضل اور محترم مریم اورنگزیب بھی تھیں۔ مریم نواز نے پی ایم ہیلتھ پروگرام اور پمزاہسپتال میں علاج معالجے کی فراہم ہونیوالی سہولیات کا تفصیلی معائنہ کرنے کے دوران پمز کے سربراہ‘ انتظامیہ کے سینئر ارکان‘ سپیشلسٹوں اور ڈاکٹروں سے ہر مریض کو فراہم ہونیوالی طبی سہولیات کے بارے میں سوالات پوچھے۔جنگ رپورٹر حنیف خالد کے مطابق اس دورے کے دوران مریم نواز کے تھنک ٹینک کے رُکن بیرسٹر دانیال چوہدری نے کہا کہ محترمہ مریم نواز نے تمام سرکاری ہسپتالوں میں مریضوں کو جدید طبی سہولیات کی فراہمی کو یقینی بنانے کا عزم کر رکھا ہے۔ وہ ہیلتھ کیئر سیکٹر اور ہسپتالوں میں مریضوں کیلئے بنیادی مثبت تبدیلیاں لانے کی بیحد خواہاں ہیں۔ محترمہ مریم نواز نے دورے کے دوران ہسپتال انتظامیہ اور عملے کو ضروری ہدایات بھی دیں۔