اسلام آباد(مانیٹرنگ ڈیسک) کوئٹہ میں لیاقت پارک کے قریب ریموٹ کنٹرول دھماکہ ہوا ہے جس کے نتیجے میں ایک پولیس، 3 ایف سی اہلکاروں سمیت 9 افراد شہید جبکہ12 افراد زخمی ہوگئے ہیں۔نجی ٹی وی کے مطابق دھماکہ عدالت روڈ کے قریبی علاقے میں ہوا ہے ، دھماکہ اتنا شدید تھا کہ اس کی گونج پورے شہر میں سنی گئی۔ جس علاقے میں دھماکہ ہوا ہے وہ کوئٹہ کا کمرشل علاقہ ہے جس پر گاڑیوں کے شوروم ، سرکاری دفاتر اور کئی دیگر دکانیں ہیں۔ دھماکے کی وجہ سے کئی گاڑیوں کو نقصان پہنچا جبکہ اردگرد کی عمارتوں کے شیشے بھی ٹوٹ گئے۔ دھماکے کے نتیجے میں 9 افراد شہید جبکہ 12 افراد زخمی ہوئے ہیں۔
دھماکے کے بعد سیکیورٹی فورسز نے دھماکے کی جگہ کو گھیرے میں لے لیا ہے اور امدادی کام شرو ع کردیا ہے جبکہ عام لوگوں کا داخلہ بھی بند کردیا ہے۔ سیکیورٹی فورسز نے زخمیوں کو طبی امداد کیلئے سول ہسپتال منتقل کردیا ہے جہاں اکثر کی حالت تشویشناک ہے۔