اسلام آباد (نیوز ڈیسک) وفاقی دارالحکومت اسلام آباد اور خیبر پختونخوا کے بالائی علاقوں میں زلزلے کے جھٹکے محسوس کیے گئے۔نجی ٹی وی چینل کے مطابق زلزلے کے جھٹکے پشاور، اسلام آباد، لاہور، ایبٹ آباد، ہری پور، مہمند ایجنسی، چارسدہ، ہنگو، سوات، قصور، کامونکی، شیخوپورہ، اوکاڑہ اور مانسہرہ میں محسوس ہوئے۔اس کے علاوہ خیبر ایجنسی، باجوڑ ایجنسی، کرم ایجنسی، استور، غذر ، چترال سمیت دیگر علاقوں میں بھی لوگوں نے زلزلے کے جھٹکے محسوس کیے۔زلزلے کے جھٹکے پشاور میں جاری پاک – چین کوریڈور کنونشن کی تقریب میں بھی محسوس کیے گئے جس سے وزیر اعلیٰ خیبر پختونخوا پرویز خٹک خطاب کر رہے تھے۔زلزلے کے باعث تقریب متاثر ہوئی اور پرویز خٹک نے اپنا خطاب روک دیا جبکہ لوگ تقریب سے اٹھ کر جانے لگیں، تاہم جھٹکے ختم ہونے کے بعد وزیر اعلیٰ خیبر پختونخوا نے اپنا خطاب مکمل کیا۔زلزلہ پیما مرکز کے مطابق زلزلے کی شدت 5.8 ریکارڈ کی گئی اور اس کی گہرائی 175 کلو میٹر زیر زمین تھی۔زلزلے کے باعث لوگ خوفزدہ ہوکر اپنے گھروں اور دفاتر سے باہر نکل آئے۔ڈی جی میٹ ڈاکٹر غلام رسول کے مطابق زلزلے کا مرکز پاک افغان سرحدی علاقہ تھا۔ان کا کہنا تھا کہ زیر زمین پلیٹیں اس وقت متحرک ہیں، اس لیے پنجاب کے شہروں میں مزید زلزلے آنے کے امکانات ہیں۔گزشتہ سال 26 اکتوبر کو اسلام آباد، خیبر پختونخوا اور شمالی علاقوں میں آنے والے خوفناک خیز زلزلے میں 250 سے زائد افراد ہلاک اور سیکڑوں زخمی ہوئے تھے۔اس تباہ کن زلزلے کے کئی روز بعد تک متاثرہ علاقوں میں زلزلے کے ذیلی جھٹکوں کا سلسلہ جاری رہا۔ایک ہفتہ قبل بھی خیبر پختونخوا اور پنجاب کے مختلف شہروں میں رات گئے زلزلے کے شدید جھٹکے محسوس کیے گئے، جس کے نتیجے میں پشاور سمیت دیگر شہروں میں 50 سے زائد افراد زخمی ہوئے۔واضح رہے کہ 8 اکتوبر، 2005 کو 7.6 شدت کے زلزلے نے کشمیر اور شمالی علاقوں میں تباہی پھیلا دی تھی۔زلزلے کے نتیجے میں 80 ہزار سے زیادہ افراد کی ہلاکت ہوئی تھی جبکہ 2 لاکھ سے زائد افراد زخمی اور ڈھائی لاکھ سے زائد افراد بے گھر ہو گئے تھے۔