اسلام آباد(مانیٹرنگ ڈیسک) وزیر اعظم نواز شریف نے قومی صحت پروگرام کا افتتاح کردیا۔ نجی ٹی وی کے مطابق پاکستان صحت کارڈ کے ذریعے پورے خاندان کا علاج ممکن ہوگا، کارڈ ہولڈر خاندان سرکاری اور نجی ہسپتال سے علاج کرا سکیں گے۔ کارڈ سے ہر خاندان کو سالانہ 3 لاکھ روپے تک علاج کی سہولت حاصل ہوگی جبکہ 3 لاکھ روپے سے زیادہ کے علاج کے اخراجات میں پاکستان بیت المال تعاون کرے گا۔ سائرہ افضل تارڑ نے وزیراعظم کو پاکستان صحت کارڈ سے متعلق بریفنگ دی اور بتایا کہ پہلے مرحلے میں 15اضلاع میں پروگرام شروع کیا جائے گا۔ وزیراعظم قومی صحت پروگرام کے تحت 7 خطرناک بیماریوں کا علاج مفت ہوگااور قومی صحت پروگرام کے تحت شوگر اور دل کی بیماریوں کا علاج کیا جائے گا۔اس موقع پر چیئرمین نادرا عثمان مبین نے بھی وزیراعظم کوبریفنگ دی اور بتایا کہ 63ہزارخاندانوں کے صحت کارڈز بن چکے ہیں۔