اسلام آباد(نیوز ڈیسک)وادی نیلم سے ملحقہ کنٹرول لائن پر بھارتی فوج کی نقل و حرکت میں غیر معمولی اضافہ ، بھارتی فوج نے بین الاقوامی اور سیز فائر معاہدے کی خلاف ورزی کرتے ہوئے سرحد کے ساتھ باڑ لگانی شروع کر دی ، بھارتی فوج کی گشت سے وادی نیلم کے مکینوں میں تشویش کی لہر دوڑ گئی اور انہوں نے پاکستانی حکام اور دفتر خارجہ سے واقعہ کا نوٹس لینے کی اپیل کر دی ۔ نجی ٹی وی کے مطابق منگل کی صبح بھارتی فوج نے وادی نیلم کے ملحقہ کنٹرول لائن پر مقبوضہ کشمیر کے مقامی افراد کو زبردستی کام پر لگاتے ہوئے سرحد کے ساتھ ساتھ نئی باڑ لگانے شروع کر دی ، جسے وادی نیلم کے مقامی لوگوں میں تشویش کی لہر دو ڑ گئی ،بھارتی فوج کی طرف سے یہ اقدام بین الاقوامی اور2003 میں پاکستان اور بھارت کے درمیان طے پانے والے سیز فائر معاہدے کی خلاف ورزی ہے ، مقامی افراد نے پاکستانی حکام اور دفتر خارجہ سے نوٹس لینے کی اپیل کی ہے ۔دفاعی تجزیہ کاروں نے بھی واقعہ پر تشویش کا اظہار کرتے ہوئے کہا کہ اس طرح کے اقدامات سے کنٹرول لائن پر صورتحال کشیدہ ہوتی ہے ،جس کے بعد فائرنگ کا تبادلہ شروع ہو جاتا ہے ،لائن آف کنٹرول پر خراب صورتحال کا اثر دونوں ملکوں کے سیاسی تعلقات پر بھی پڑتا ہے ۔